मुंबई | विशेष प्रतिनिधी
मराठी चित्रपटसृष्टी आणि रंगभूमीवर आपल्या दिग्दर्शनाचा वेगळा ठसा उमटवणारे प्रसिद्ध दिग्दर्शक आणि लेखक केदार शिंदे हे त्यांच्या कामासोबतच त्यांच्या अढळ स्वामी भक्तीसाठी देखील ओळखले जातात. आज यशाच्या शिखरावर असलेल्या केदार शिंदेंचा प्रवास नेहमीच सुखाचा नव्हता. त्यांच्या संघर्षाच्या काळात त्यांना श्री स्वामी समर्थ महाराजांचा मोठा आधार मिळाला. नुकतीच त्यांनी सोशल मीडियावर ३ जुलै १९९७ च्या त्या अविस्मरणीय दिवसाची आठवण शेअर केली आहे, ज्या दिवसाने त्यांच्या आयुष्याला एक नवीन दिशा दिली.
नेमकं काय घडलं त्या दिवशी? केदार शिंदे यांनी शेअर केलेल्या आठवणीनुसार, ही घटना ३ जुलै १९९७ सालची आहे. त्यावेळी त्यांच्या गाजलेल्या ‘सही रे सही’ या नाटकाचे प्रयोग जोरात सुरू होते. दादर येथील शिवाजी मंदिरात नाटकाच्या प्रयोगाची लगबग सुरू होती. पडद्यामागे सर्व कलाकार आणि तंत्रज्ञ आपापल्या कामात व्यग्र होते. मात्र, केदार शिंदे यांच्या मनात एक वेगळीच चलबिचल सुरू होती. कामाचा ताण आणि मनातील काही प्रश्नांमुळे त्यांना निवांत क्षणांची आणि शांततेची गरज भासत होती.
हे देखील वाचा
असा लागला स्वामींच्या मठाचा शोध मनाला थोडी उसंत मिळावी म्हणून मेकअप सुरू असतानाच केदार शिंदे शिवाजी मंदिरातून बाहेर पडले. दादरच्या गजबजलेल्या रस्त्यावरून चालताना त्यांचे पाऊल नकळत एका गल्लीकडे वळले. त्या गल्लीतून पुढे गेल्यावर त्यांना एक जुना मठ दिसला. विशेष म्हणजे, तोपर्यंत केदार शिंदे यांना स्वामी समर्थ कोण आहेत किंवा त्या मठाचे महात्म्य काय आहे, याची पुसटशीही कल्पना नव्हती. केवळ एक अनामिक ओढ आणि शांततेचा शोध त्यांना त्या मठापर्यंत घेऊन गेला.
स्वामीचरणी नतमस्तक आणि आयुष्याला कलाटणी कुतूहलापोटी ते मठाच्या पायऱ्या चढून आत गेले. समोर स्वामींची मूर्ती पाहताच त्यांनी डोळे मिटून नतमस्तक होत दर्शन घेतले. त्या क्षणी त्यांना एक विलक्षण ऊर्जा आणि मनाला अथांग शांतता लाभली. मनातली सर्व चलबिचल थांबली. तो क्षण त्यांच्या आयुष्यातील ‘टर्निंग पॉईंट’ ठरला. ज्या स्वामींची ओळखही नव्हती, त्यांच्याच चरणी केदार शिंदे लीन झाले आणि तिथूनच त्यांच्या स्वामी भक्तीचा प्रवास सुरू झाला.
स्वामींच्या कृपेने यशाचे शिखर त्या दिवशी मिळालेल्या आत्मिक समाधानानंतर केदार शिंदे यांनी कधीच मागे वळून पाहिले नाही. आयुष्यातील अनेक कठीण प्रसंगात स्वामी समर्थांच्या आशीर्वादाने त्यांना सावरले. आज मिळालेले सर्व यश, कीर्ती आणि सुख हे केवळ स्वामींची कृपा असल्याचे ते मानतात. आजही आपल्या यशाचे श्रेय ते स्वामी समर्थांनाच देतात.
टीप: बातमीतील व्यक्तीचा फोटो मूळ (Original) आहे. फोटोच्या चांगल्या सादरीकरणासाठी (Presentation) आणि ग्राफिक्ससाठी AI तंत्रज्ञानाचा वापर केला आहे.
